Հայաստանը մասնակցեց «Հաշտեցման դերը խաղաղության և անվտանգության պահպանության գործում» խորագրով ՄԱԿ-ի Անվտանգության խորհրդի հանդիպմանը

20 նոյեմբերի, 2019

Ս․թ․ նոյեմբերի 19-ին տեղի ունեցավ ՄԱԿ-ի Անվտանգության խորհրդի հանդիպում «Հաշտեցման դերը խաղաղության և անվտանգության պահպանության գործում» թեմայով, որին ելույթ ունեցան ՄԱԿ Գլխավոր քարտուղար Անտոնիո Գուտերեշը և մի շարք անդամ-երկրների ներկայացուցիչներ` անդրադառնալով պետությունների և պատերազմներից տուժած հասարակությունների միջև հաշտեցման խնդրին։

ՄԱԿ-ում ՀՀ մշտական ներկայացուցիչ Մհեր Մարգարյանն իր ելույթում նշելով, որ հաշտեցումը կարևոր է խաղաղության և անվտանգության պահպանման համար, շեշտեց, որ այնպիսի բացառիկ հանցագործությունների դեպքում ինչպիսին ցեղասպանությունն է, հաշտեցումը պետք է հիմնվի ճշմարտությանը և արդարությանն առերեսվելու ու պատասխանատվության վրա և պարունակի չկրկնվելու երաշխիքներ։

Մ. Մարգարյանը նշեց, որ Հայոց ցեղասպանության ճանաչումը և դատապարտումը էական նշանակություն ունի ճշմարտության, պատմական արդարության և հաշտեցման համար՝ ընդգծելով, որ ցեղասպանության ժխտման կամ արդարացմանն փորձերը, ոչ միայն դատապարտելի են, այլև խաթարում են անպատժելիության դեմ պայքարը և ապագա զանգվածային ոճրագործությունները կանխարգելելու ջանքերը։

Իր ելույթում Հայաստանի մշտական ներկայացուցիչն անդրադարձավ նաև հաշտեցման գործընթացներում կրոնական առաջնորդների դերակատարությանը՝ այդ համատեքստում դատապարտելով ահաբեկիչների կողմից Կամիշլիի Հայ Կաթողիկե եկեղեցու հոգևորականների սպանությունը և ընդգծելով մեղավորներին բացահայտելու ու պատժելու անհրաժեշտությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր