Հայաստանը մասնակցեց «ՄԱԿ Կանոնադրության դերակատարությունը միջազգային խաղաղության և անվտանգության պահպանության գործում»խորագրով ՄԱԿ-ի Անվտանգության խորհրդի հանդիպմանը

10 հունվարի, 2020

Հունվարի 9-ին ՄԱԿ Անվտանգության խորհրդում տեղի ունեցավ «ՄԱԿ Կանոնադրության դերակատարությունը միջազգային խաղաղության և անվտանգության պահպանության գործում» խորագրով հանդիպումը, որին ելույթ ունեցավ Հայաստանի մշտական ներկայացուցիչ Մհեր Մարգարյանը։ Վիետնամի փոխվարչապետ և արտաքին գործերի նախարարի նախագահությամբ հանդիպմանը ելույթ ունենալու համար գրանցվել էին ավելի քան հարյուր անդամ պետություններ: ՄԱԿ Գլխավոր քարտուղար Անտոնիո Գուտերեշն իր զեկույցում ներկայացրեց ՄԱԿ Կանոնադրության դերակատարությունը միջազգային խաղաղության և անվտանգության պահպանության գործում միջազգային վերջին զարգացումների համատեքստում։

Անդրադառնալով Երկրորդ համաշխարհային պատերազմի ավարտից հետո Միավորված ազգերի կազմակերպության ստեղծման 75-րդ տարեդարձին՝ Մհեր Մարգարյանը նշեց, որ հայ ժողովուրդը նշանակալի ավանդ է ունեցել պատերազմի հաղթանակում, ինչը հնարավոր դարձրեց Միավորված ազգերի կազմակերպության ստեղծումը։
ՀՀ մշտական ներկայացուցիչը շեշտեց, որ ինքնուրույն իրենց ապագան որոշելու ժողովուրդների իրավունքը բխում է ՄԱԿ Կանոնադրության նպատակներից և սկզբունքերից։ Այդ համատեքստում նա ընդգծեց, որ Լեռնային Ղարաբաղի ժողովրդի ինքնորոշման իրավունքն իրավական ուժ ունեցող ազատ կամաարտահայտության հիման վրա հանդիսանում է հակամարտության կարգավորման հիմնարար սկզբունք, որը ճանաչված է ԵԱՀԿ Մինսկի խմբի համանախագահների կողմից։

Անդրադառնալով Իրաքում և Մերձավոր Արևելքում վերջին զարգացումներին, Մ․ Մարգարյանը մտահոգություն հայտնեց իրավիճակի ապակայունացման առնչությամբ՝ վերահաստատելով լարվածությունը թուլացնելու և բացառապես երկխոսության ու խաղաղ միջոցներով հանգուցալուծման հասնելու Հայաստանի կոչը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր