Բնական պաշարների կառավարման թեման ՄԱԿ-ի Անվտանգության խորհրդում

22 հունիսի, 2013

Հունիսի 19-ին, ՄԱԿ-ի Անվտանգության խորհրդի 'Միջազգային խաղաղություն և անվտանգություն” օրակարգի կետի ներքո տեղի է ունեցել քննարկում “Հակամարտությունների կանխարգելում և բնական պաշարներ” խորագրով ու անդրադարձ կատարվել կառավարությունների առաջնային պատասխանատվությանը` բացառել հակամարտություններում բնական պաշարների խթանիչ դերն ու ապահովել մասնավորապես նավթի, քարածխի, ադամանդների, թանկարժեք մետաղների արդյունահանման բնագավառում թափանցիկ, արդար կառավարումը: Քննարկմանը մասնակցել ու ելույթներով հանդես են եկել ՄԱԿ-ի գլխավոր քարտուղարի տեղակալները, Համաշխարհային բանկի կառավարիչ տնօրենը և անդամ պետությունների ներկայացուցիչները:

ՄԱԿ-ում Հայաստանի մշտական ներկայացուցիչ, դեսպան Կարեն Նազարյանն իր ելույթում կարևորելով ՄԱԿ-ի և Բրետոնվուդյան ինստիտուտների դերակատարումը խրախուսելու համար տվյալ բնագավառում համընդհանուր քաղաքականության մշակումը, նշել է, որ անհրաժեշտ է վերլուծել բնական պաշարների դերը նաև հակամարտությունների քաղաքական կարգավորումը երկարաձգելու հարցում և առաջարկել ուսումնասիրել Հարավային Կովկասի երկրների մոտեցումները ու նրանց կողմից վարվող քաղաքականությունը:

Դեսպանը նշել է, որ մեխանիզմները, որոնց միջոցով բնական պաշարները խթանում կամ երկարաձգում են հակամարտությունները խորը արմատներ ունեն տնտեսական ու սոցիալական ոլորտներում ու անդրադարձել կաշառակերության, թույլ պետության և հաշվետվության բացակայությանը, որոնք հիմնականում կապված են բնական պաշարներից ստացվող լայնամասշտաբ եկամուտների հետ:

Կ. Նազարյանը հավելել է, որ միջազգայնորեն համաձայնեցված զարգացման նպատակներին հասնելու համար անդամ պետություններին տրված է լավագույն հնարավորություն իրենց կայուն զարգացման ազգային ծրագրերում հակամարտությունների կանխարգելման և խաղաղաշինության հետ մեկտեղ ներառել նաև բնական պաշարների կառավարման հարցերը, ինչն առաջին հերթին կպահանջվի քաղաքական կամքի ու վճռականության դրսևորում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր