Ցեղասպանության կոնվենցիայի 65-ամյակին նվիրված միջոցառումներ ՄԱԿ-ում

13 դեկտեմբերի, 2013

Դեկտեմբերի 9-ին և 12-ին ՄԱԿ-ի կենտրոնատեղիում կազմակերպվել էին Ցեղասպանության հանցագործությունը կանխարգելելու և պատժելու մասին կոնվենցիայի ընդունման 65-ամյակին նվիրված քննարկումներ, որոնց հիմնական բանախոսներն իրենց ելույթներում ընդգծել են կոնվենցիայի կարևորությունը և նշանակությունը մարդկության դեմ ծանր հանցագործությունների կանխարգելման ու դատապարտման հարցում:

Քննարկմանը մասնակցող ՄԱԿ-ում ՀՀ մշտական ներկայացուցիչ, դեսպան Կարեն Նազարյանը բարձր է գնահատել Ռաֆայել Լեմկինի ներդրումը կոնվենցիայի մշակման և վերջինիս անփոխարինելի դերը ցեղասպանության ոճիրի իրավական սահմանման գործում: Լսարանին հիշեցնելով, որ իր մասնագիտությունը ընտրելու Լեմկինի որոշման համար շրջադարձային է եղել նրա կողմից Հայոց ցեղասպանության ուսումնասիրությունը, Հայաստանի դեսպանը նշել է, որ մարդկության դեմ ոճրագործությունների դեմ պայքարի այդ անկոտրուն նվիրյալը հետագա իր կյանքը նվիրել է ցեղասպանության ճշմարտության բացահայտմանն ու կանխարգելմանը: Դեսպան Նազարյանը հավելել է, որ Հայաստանը շարունակում է քայլել ձեռնարկել մարդկության դեմ ծանր հանցագործությունների կանխարգելման և դատապարտման ուղղությամբ ու իր անվերապահ աջակցությունը հայտնել Ցեղասպանության կանխարգելման ու պաշտպանելու պատասխանատվության ՄԱԿ-ի գրասենյակների գործունեության առթիվ:

Քննարկումներից մեկում ցուցադրվել է հատված Ռ. Լեմկինի հայտնի հարցազրույցից, ուր նա պատասխանելով այն հարցին թե ինչը ստիպեց իրեն հետաքրքրվել ցեղասպանության թեմայով նշում է. «Այն (ցեղասպանությունը) տեղի ունեցավ մի քանի անգամ: Այն տեղի ունեցավ հայերի հանդեպ, իսկ հայերից հետո Հիտլերն անցավ գործի»: Քննարկման մասնակիցների ու բանախոսների կողմից անդրադարձ է կատարվել 1915թ Հայոց ցեղասպանության հարյուրամյակի ոգեկոչմանը:

Միջոցառումներին, ի թիվս անդամ պետությունների, մասնակցել են ՄԱԿ-ի տարբեր մարմինների պաշտոնյաներ ու փորձագետներ, ՀԿ և ԶԼՄ-ների ներկայացուցիչներ, ինչպես նաև Ռաֆայել Լեմկինի ընտանիքի անդամները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր