Ցուցահանդես ՄԱԿ-ի կենտրոնակայանում

05 մարտի, 2015

Մարտի 5-ին ՄԱԿ-ում ՀՀ մշտական ներկայացուցչությունը Հայ Օգնության Միության (ՀՕՄ) հետ համատեղ ՄԱԿ-ի կենտրոնակայանում կազմակերպել էր ընդունելություն, որով ազդարարվեց «Ասեղնագործություն գոյատևելու համար» խորագրով հայ կանանց ձեռագործ իրերի ցուցահանդեսի պաշտոնական մեկնարկը:

Ընդունելությանը ներկա էին հոգևոր դասի, ՄԱԿ-ի անդամ պետությունների, տեղական ու միջազգային տարբեր կառույցների ներկայացուցիչներ, հասարակական-քաղաքական գործիչներ, լրագրողներ։

Ընդունելությանն իր ողջույնի խոսքում ՄԱԿ-ում ՀՀ մշտական ներկայացուցիչ Զոհրաբ Մնացականյանը նշեց, որ ցուցահանդեսի միջոցով ներկայացվում է մի ժողովրդի պատմություն, ով ճիշտ 100 տարի առաջ ենթարկվել է ոճրագործության, ինչն այն ժամանակ բնութագրվել է որպես «հանցագործություն մարդկության և քաղաքակրթության դեմ»։ Ըստ Մնացականյանի` ուսումնասիրելով հայերի դեմ իրագործված այդ եղեռնագործությունը` Ռաֆայել Լեմկինը երեք տասնամյակ անց ստեղծել է «ցեղասպանություն» տերմինը։

ՀՀ մշտական ներկայացուցիչն ընդգծեց ցուցահանդեսի առաձնահատկությունը, քանի որ այն, միահյուսելով «խորհրդանշականն ու իրականությունը», ի ցույց է դնում եղեռնից մազապուրծ եղած կանանց մասին պատմություն: Ըստ դեսպանի` հայ կանայք, ապաստան գտնելով այլ երկրներում, ի զորու են եղել վերականգնել իրենց կյանքը և վերահաստատել իրենց ինքնությունը` հարմարվելով նոր միջավայրին ու իրականությանը: Երախտագիտություն հայտնելով ՀՕՄ-ին և ցուցահանդեսի մյուս աջակիցներին՝ ՀՀ մշտական ներկայացուցիչը շեշտեց, որ իր ժողովուրդը ոչ միայն կառողացավ ուժ գտնել` հիմնելու հզոր կառույցներ սփյուռքում, այլև, ի վերջո, ճանապարհ հարթեց` վերականգնելու իր պետականությունը և կանգնելու ՄԱԿ-ի մյուս անդամների կողքին։

Իր խոսքում ՀՕՄ-ի ատենապետ Վիքի Մարաշլյանը մատնանշեց ցուցահանդեսի կարևորությունը կանանց առաջխաղաղացման ու Կանանց կարգավիճակի հանձնաժողովի 59-րդ նստաշրջանի լույսի ներքո։ ՀՕՄ-ի ատենապետը նշեց․ «Արվեստի այս գործերի ցուցադրմամբ մենք այսօր միասին հավաքվել ենք` տոնելու մեր նախնիների, մայրերի ու կանանց տոկունությունը, զարթոնքն ու ձեռքբերումները»։

Ցուցահանդեսում ներկայացված են ԱՄՆ հայկական թանգարանից բերված հայ կանանց գործվածքային ձեռագործ իրերի ցուցանմուշներ` 19-րդ դարի վերջերից մինչև մեր օրերը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր