Նյու Յորքի «Քարնեգի Հոլ» համերգասրահում Հայաստանի Հանրապետության անկախության 30-րդ տարեդարձին նվիրված համերգ և ընդունելություն

13 հոկտեմբերի, 2021

Հոկտեմբերի 13-ին Նյու Յորքի հանրահայտ «Քարնեգի հոլ» համերգասրահում ՄԱԿ-ում Հայաստանի մշտական ներկայացուցչության հովանու ներքո տեղի ունեցավ համերգ` նվիրված Հայաստանի Հանրապետության անկախության 30-րդ տարեդարձին։ Ամերիկահայ դաշնակահարուհի Կարինե Պողոսյանի կատարմամբ հնչեցին Արամ Խաչատրյանի, Սերգեյ Ռախմանինովի, Ջորջ Գերշվինի և այլ աշխարհահռչակ կոմպոզիտորների ստեղծագործությունները։

Համերգին հաջորդեց ՀՀ մշտական ներկայացուցչության կողմից կազմակերպված պաշտոնական ընդունելություն, որին ներկա էին ՄԱԿ անդամ պետությունների մշտական ներկայացուցչությունների ղեկավարներ, դիվանագետներ, ՄԱԿ Քարտուղարության պաշտոնյաներ և Նյու Յորքի հայ համայնքի ներկայացուցիչներ։

ՄԱԿ-ում ՀՀ մշտական ներկայացուցիչ Մհեր Մարգարյանն իր ողջույնի խոսքում ներկայացրեց Հայաստանի բազմադարյան պատմությունը և մշակութային ժառանգությունը ու հայ ժողովրդի ներդրումը համաշխարհային քաղաքակրթությանը։ Անդրադառնալով անկախության վերականգնումից հետո հայ ժողովրդի առջև ծառացած բազում մարտահրավերներին՝ դեսպան Մարգարյանը նշեց, որ Հայաստանն իրեն սերտորեն կապակցում է Միավորված ազգերի կազմակերպության նպատակների ու սկզբունքների հետ` ընդգծելով, որ հայկական մշակույթի, կրոնի և լեզվի վրա խարսխված ինքնության շնորհիվ հայ ժողովուրդը մշտապես ի ցույց է դրել արհավիրքներից վերականգնվելու և նոր կյանք կառուցելու կարողությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր