Ցեղասպանության հանցագործության զոհերի հիշատակին ու արժանապատվությանը և այդ հանցագործության կանխարգելման միջազգային օրվան նվիրված առցանց միջոցառում

09 դեկտեմբերի, 2021

Դեկտեմբերի 9-ին ՄԱԿ-ում Հայաստանի մշտական ներկայացուցչությունը և Պաշտպանելու պատասխանատվության գլոբալ կենտրոնը համատեղ կազմակերպել են «Կրթության դերը ցեղասպանության ժխտողականության դեմ պայքարում» խորագրով առցանց քննարկում։

Միջոցառման մասնակիցներին ուղղված տեսաուղերձներով հանդես են եկել Հայաստանի արտաքին գործերի նախարարի տեղակալ Վահե Գևորգյանը և Ցեղասպանության կանխարգելման հարցերով ՄԱԿ Գլխավոր քարտուղարի հատուկ խորհրդական Էլիս Վաիրիմու Նդերիտուն։

Ելույթներով հանդես են եկել ՄԱԿ-ում ՀՀ մշտական ներկայացուցիչ Մհեր Մարգարյանը, Պաշտպանելու պատասխանատվության գլոբալ կենտրոնի գործադիր տնօրեն Սավիտա Պոնդեյը, Նյու Յորքի Կոլումբիայի համալսարանի դասախոս Խաչիկ Մուրադյանը, Մասաչուսեթսի Քլարկի համալսարանի պատմության պրոֆեսոր Թաներ Աքչամը, Յոհանեսբուրգի Հոլոքոստի և ցեղասպանության կենտրոնի գործադիր տնօրեն Թալի Նեյթսը, ԱՄՆ Հոլոքոստի հիշատակի թանգարանի ծրագրերի պատասխանատու Անդրեա Գիթելմանը և Ցեղասպանության ու զանգվածային ոճրագործությունների կանխարգելման Աուշվիցի ինստիտուտի գործադիր փոխտնօրեն Ջեկ Մայերհոֆերը։

Միջոցառման մասնակիցները քննարկել են զանգվածային ոճրագործությունների ժխտողականության նոր ձևերը ու դրա ներգործությունը ցեղասպանությունների զոհերի ճշմարտության և արդարության իրավունքի իրացման վրա: Անդրադարձ է կատարվել ավանդական և ժամանակակից մամուլի ներգործությանը և կրթության առանցքային դերակատարությանը՝ պատմական հիշողության պահպանման, անցյալի հանցագործությունների հիշատակի և ժխտողականության հայեցակարգերին հակազդեցության գործում։

Միջոցառման ավարտին նյույորքաբնակ հայազգի դաշնակահարուհի Կարինե Պողոսյանի կատարմամբ հնչել են Կոմիտասի ստեղծագործությունները։

Միջոցառման տեսագրությունը հասանելի է ՄԱԿ- կայքում հետևյալ հղումներով՝

https://media.un.org/en/asset/k1w/k1wtccbods

https://www.youtube.com/watch?v=fwGkpxOOTq0:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր