ՄԱԿ-ում ՀՀ մշտական ներկայացուցիչը ելույթ է ունեցել ՄԱԿ-ի մանկական հիմնադրամի գործադիր խորհրդի տարեկան նստաշրջանին

13 հունիսի, 2023

Հունիսի 13-ին տեղի է ունեցել ՄԱԿ-ի մանկական հիմնադրամի (UNICEF) գործադիր խորհրդի տարեկան նստաշրջանի բացման հանդիպումը, որի ընթացքում ելույթներ են ունեցել Հիմնադրամի գործադիր տնօրեն Քեթրին Ռասելը և ՄԱԿ անդամ պետությունների ներկայացուցիչները։ Իր ելույթում ՄԱԿ-ում ՀՀ մշտական ներկայացուցիչ Մհեր Մարգարյանը, մասնավորապես, նշել է, որ Հայաստանը կարևորում է ՄԱԿ-ի մանկական հիմնադրամի հետ համագործակցությունը՝ ուղղված երեխաների իրավունքների պաշտպանությանն ու առաջ մղմանը, երեխաների կարիքները հաշվի առնող սոցիալական պաշտպանության ներառական ծառայության ստեղծմանը, որակյալ կրթության ու մատչելի առողջապահության հասանելիության ապահովմանը և խոցելի իրավիճակներում գտնվող երեխաների համար բարենպաստ միջավայրի կառուցմանը։

Ընդգծվել է, որ միջազգային հումանիտար իրավունքը և մարդու իրավունքները կարևոր շրջանակ են ստեղծում հակամարտային իրավիճակներում երեխաների արդյունավետ պաշտպանության համար՝ այդ համատեքստում կարևորելով, որ այս խնդիրը Հիմնադրամի կողմից առավել մեծ ուշադրության արժանանա։

Դեսպան Մարգարյանը նշել է, որ Լեռնային Ղարաբաղը Հայաստանի և արտաքին աշխարհի հետ կապող Լաչինի միջանցքով ազատ տեղաշարժը վեց ամսից ավելի արգելափակումը զրկել է 120 հազար մարդկանց, այդ թվում՝ 30 հազար երեխաներին մարդու հիմնարար իրավունքներից, այդ թվում՝ կյանքի, կրթության և առողջության իրավունքներն իրացնելու հնարավորությունից։ Ընդգծվել է, որ Լեռնային Ղարաբաղում ահագնացող հումանիտար ճգնաժամը պահանջում է ՄԱԿ-ի մանկական հիմնադրամի անմիջական ներգրավվածությունը՝ երեխաների առաջնային կարիքները հոգալու և առավել խոցելիների հատուկ պաշտպանությունը երախշավորելու նպատակով՝ իր մանդատին համապատասխան։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր