ՄԱԿ-ում Հայաստանի մշտական ներկայացուցչի նամակը Լեռնային Ղարաբաղում հումանիտար իրավիճակի և ոճրագործությունների կանխարգելման հրամայականի վերաբերյալ

15 սեպտեմբերի, 2023

Սեպտեմբերի 15-ին որպես ՄԱԿ Անվտանգության խորհրդի և Գլխավոր ասամբլեայի փաստաթուղթ հրապարակվել է ՄԱԿ-ում ՀՀ մշտական ներկայացուցիչ Մհեր Մարգարյանի նամակը՝ Ադրբեջանի կողմից Լաչինի միջանցքի ապօրինի արգելափակման հետևանքով Լեռնային Ղարաբաղում ահագնացող ճգնաժամային իրավիճակի և էթնիկ զտման սպառնալիքի վերաբերյալ։

Նամակում անդրադարձ է կատարվում Ադրբեջանի կողմից Արդարադատության միջազգային դատարանի որոշումների չիրականացմանը և Լեռնային Ղարաբաղում հումանիտար ճգնաժամ առաջացնելու նպատակադրված քաղաքականությանը՝ նշելով, որ դա ի ցույց է դնում զանգվածային ոճրագործություն իրականացնելու Ադրբեջանի մտադրությունը։ Հիշատակելով Լեռնային Ղարաբաղի բնակչության էթնիկ զտման վտանգի մասին մարդու իրավունքների փորձագետների և ցեղասպանագետների ահազանգները՝ ՀՀ մշտական ներկայացուցիչը ընդգծում է ՄԱԿ կողմից կանխարգելիչ կարողությունների մոբիլիզացման հրամայականը՝ պաշտպանելու պատասխանատվության իրականացման և ոճրագործությունները կանխլու նպատակով։

Նամակին կից շրջանառվել է նաև Մարդու իրավունքների պրոֆեսոր, Ցեղասպանության կանխարգելման հարցերով ՄԱԿ Գլխավոր քարտուղարի առաջին հատուկ խորհրդական Խուան Մենդեսի զեկույցը՝ Լեռնային Ղարաբաղում ստեղծված իրավիճակի և միջազգային հանրության կողմից ոճրագործությունների կանխարգելման նպատակով միջոցներ ձեռնարկելու անհրաժեշտության վերաբերյալ։

Փաստաթուղթը հասանելի է հետևյալ հղումով` https://undocs.org/en/A/78/335

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր