ՄԱԿ-ում ՀՀ մշտական ներկայացուցիչ Պարույր Հովհաննիսյանի ելույթը Ատելության խոսքի դեմ պայքարի միջազգային օրվան նվիրված հանդիպմանը

18 հունիսի, 2026

Ատելության խոսքի դեմ պայքարի միջազգային օրվան նվիրված բարձր մակարդակի հանդիպմանը ՄԱԿ-ում ՀՀ մշտական ներկայացուցիչ Պարույր Հովհաննիսյանը վերահաստատեց Հայաստանի հանձնառությունը ատելության խոսքի դեմ պայքարին՝ այն դիտարկելով որպես կանխարգելման օրակարգի անբաժանելի մաս։

Նշվեց, որ ատելության խոսքը, հատկապես երբ այն ուղղված է էթնիկ և կրոնական խմբերի դեմ, շարունակում է նպաստել խտրականությանն ու բռնությանը՝ միաժամանակ ստեղծելով պայմաններ, որոնք խթանում են այլատյացությունը և որոշ ծայրահեղ դեպքերում նույնիսկ զանգվածային ոճրագործությունների իրականացումը:

Դեսպան Հովհաննիսյանը շեշտեց օրենքի գերակայության և արդարադատության հասանելիության կարևորությունը՝ ատելության խոսքի, ապատեղեկատվության, ինչպես նաև անհատների և խմբերի թիրախավորման դեմ պայքարում՝ միաժամանակ պահպանելով խոսքի ազատության պաշտպանության և ատելության տարածման կանխարգելման միջև հավասարակշռությունը։

Նա նաև ընդգծեց կրթության դերը հանդուրժողականության խթանման և ատելության խոսքի դեմ պայքարի գործում՝ հիշատակելով Հայաստանի նախաձեռնությամբ և սույն ամսվա սկզբին կոնսենսուսով ընդունված ՄԱԿ Գլխավոր ասամբլեայի «Կրթություն հանուն խաղաղության» բանաձևը, որը նպատակ ունի լիարժեքորեն իրացնել կրթության փոխակերպող ներուժը՝ խաղաղության, ոչ բռնության և ներառական հասարակությունների առաջմղման համար։

Ելույթի տեքստն ամբողջությամբ հասանելի է հետևյալ հղումով՝ https://un.mfa.am/en/statements/2026/06/18/statement-by-h-e-mr-paruyr-hovhannisyan-permanent-representative-of-armenia-to-the-un-at-the-high-l/16021:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր