ՄԱԿ-ում Հայաստանի մշտական ներկայացուցիչը ելույթ է ունեցել ՄԱԿ Տնտեսական և սոցիալական խորհրդի հումանիտար հարցերին նվիրված նստաշրջանին

21 հունիսի, 2022

Հունիսի 21-ին ՄԱԿ-ում ՀՀ մշտական ներկայացուցիչ Մհեր Մարգարյանը ելույթ է ունեցել հումանիտար հարցերին նվիրված ՄԱԿ Տնտեսական և սոցիալական խորհրդի նստաշրջանի բացմանը։ Հանդիպմանը ՄԱԿ ճգնաժամային հումանիտար աջակցության վերաբերյալ զեկույցով հանդես են եկել ՄԱԿ Գլխավոր քարտուղար Անտոնիո Գուտերեշը և Հումանիտար հարցերով գլխավոր քարտուղարի տեղակալ Մարտին Գրիֆիթսը։

ՀՀ մշտական ներկայացուցիչն իր ելույթում նշել է, որ անդամ-պետությունների կողմից միջազգային հումանիտար իրավունքի սկզբունքների նկատմամբ հարգանքն առանցքային նախադրյալ է ՄԱԿ հումանիտար մանդատի իրականացման և, առանց խտրականության, մարդկանց աջակցություն ցուցաբերելու համար։

Նշվել է, որ Լեռնային Ղարաբաղի դեմ 2020թ. աշնանը սանձազերծած ագրեսիայից ի վեր ՄԱԿ Հումանիտար աջակցության հարցերով գրասենյակը (OCHA) հստակ առաջարկներ է ներկայացրել տուժած բնակչության հումանիտար իրավիճակը գնահատելու և անկողմնակալ հումանիտար գործողություններ ձեռնարկելու նպատակով։ Շեշտվել է, որ Ադրբեջանը, կոպտորեն արհամարհելով միջազգային հումանիտար իրավունքը, շարունակում է խոչընդոտել ՄԱԿ գործակալությունների մուտքը Լեռնային Ղարաբաղ՝ հակամարտությունից տուժած մարդկանց զրկելով միջազգային աջակցությունից օգտվելու հնարավորությունից։

Դեսպան Մարգարյանն ընդգծել է, որ այն իրավիճակներում, երբ կյանքի իրավունքը և մարդկային արժանապատվությունը անխուսափելի վտանգի տակ են, ՄԱԿ համակարգի համար գերակայություն պետք է լինի մարդու իրավունքների վրա հիմնված, մարդակենտրոն և ներառական մոտեցման ապահովումը, ինչը թույլ կտա արդյունավետ կերպով և ժամանակին աջակցություն տրամադրել հակամարտություններից տուժած կարիքավոր բնակչությանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր