ՄԱԿ-ում ՀՀ մշտական ներկայացուցիչը ելույթ է ունեցել պաշտպանելու պատասխանատվության և ցեղասպանությունների կանխարգելման վերաբերյալ ՄԱԿ Գլխավոր ասամբլեայի հանդիպմանը

23 հունիսի, 2022

Հունիսի 23-ին տեղի է ունեցել «Պաշտպանելու պատասխանատվություն, ցեղասպանության կանխարգելում, ռազմական հանցագործություններ, էթնիկ զտումներ և մարդկության դեմ հանցագործություններ» օրակարգի կետի ներքո ՄԱԿ Գլխավոր ասամբլեայի լիագումար հանդիպումը: Հանդիպմանը զեկույցով հանդես է եկել Ցեղասպանությունների կանխարգելման հարցով ՄԱԿ Գլխավոր քարտուղարի հատուկ խորհրդական Ալիս Նդերիտուն, ինչին հաջորդել են օրակարգի կետի շուրջ քննարկումները:

ՄԱԿ-ում ՀՀ մշտական ներկայացուցիչ Մհեր Մարգարյանը, հանդես է եկել ելույթով, որում նշել է, որ անհանդուրժողականությունը, խտրականությունը, ինքնության հիմքով ատելության խոսքը ոճրագործությունների իրականացման նախադրյալներից են՝ ընդգծելով հատկապես կրթական ծրագրերի օգտագործմամբ գալիք սերունդների մեջ այլատյացություն սերմանելու անթույլատրելիությունը:

Խոսելով Ցեղասպանության կանխարգելման և դրա համար պատժի կոնվենցիայի կիրառման ամրապնդման ջանքերում Հայաստանի ներգրավվածության մասին՝ դեսպան Մարգարյանը շեշտել է անցյալի ոճրագործությունների ճանաչման և դատարպման, ինչպես նաև ժխտողականության դեմ պայքարի առանցքային կարևորությունը։ Ելույթում նշվել է Հայոց Ցեղասպանության պատմական իրողության խեղաթյուրման փորձերի անթույլատրելության, ինչպես նաև ժխտողականությանն ուղղված ջանքերի սնանկության մասին՝ հիշեցնելով, որ Օսմանյան կայսրությունում հայերի դեմ գործած ոճրագործությունն է նաև հիմք հանդիսացել Ռաֆայել Լեմկինի կողմից ցեղասպանության եզրույթի ստեղծման համար։

ՀՀ մշտական ներկայացուցիչն իր ելույթում անդրադարձել է նաև զանգվածային ոճրագործությունների և մշակութային ժառանգության ոչնչացման փոխկապակցվածության մասին՝ կարևորելով ՅՈՒՆԵՍԿO-ի ներգրավվածությունը հակամարտությունների գոտիներում մշակութային ժառանգության պաշտպանության և մշակութային, կրոնական ու պատմական արժեք ունեցող հուշարձանների պահպանության և վերականգնման հարցերում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր