ՄԱԿ-ում ՀՀ մշտական ներկայացուցչի ելույթը կազմակերպության գործունեության գերակայություններին նվիրված Գլխավոր ասամբլեայի նիստին

06 փետրվարի, 2023

Փետրվարի 6-ին տեղի է ունեցել ՄԱԿ-ի Գլխավոր ասամբլեայի լիագումար նիստը, որի ընթացքում Գլխավոր քարտուղար Անտոնիո Գուտերեշը ներկայացրել է ՄԱԿ 2022թ․ գործունեության վերաբերյալ զեկույցը։ Հանդիպմանը ելույթով հանդես է եկել ՄԱԿ-ում ՀՀ մշտական ներկայացուցիչ Մհեր Մարգարյանը՝ անդրադառնալով կազմակերպության գործունեությանը և գերակայություններին։

Մ․ Մարգարյանը, մասնավորապես, կարևորել է մարդու իրավունքներին և հիմնարար ազատություններին, այլատյացության, խտրականության և ատելության դեմ պայքարին, խոցելի իրավիճակներում հայտնված մարդկանց պաշտպանությանը գերակայություն տալը հակամարտությունների և ճգնաժամերի համատեքստերում։

Դեսպան Մարգարյանը Գլխավոր ասամբլեայի և ՄԱԿ Գլխավոր քարտուղարի ուշադրությունը հրավիրել է այն հանգամանքի վրա, որ շուրջ երկու ամիս շարունակվող Լեռնային Ղարաբաղի շրջափակման, Արցախում ստեղծված վտանգավոր հումանիտար իրավիճակի կապակցությամբ կարիք կա ՄԱԿ-ի կողմից էական գործողությունների իրականացման։ Ընդգծվել է, որ Ադրբեջանը փորձում է բռնության ու ագրեսիայի միջոցով միակողմանի լուծումներ պարտադրել ու իրականացնել Լեռնային Ղարաբաղի ազգաբնակչության էթնիկ զտման քաղաքականություն։ Նշվել է, որ կազմակերպության հանդեպ վստահելիությունը հայտնվում է հարցականի տակ, երբ այն չի կարողանում վերհանել վերահաս հումանիտար ճգնաժամերը և զանգվածային բռնությունների ու ատելության հիմքով ոճրագործությունների վտանգները։

Կարևորելով բազմակողմանիության դերը փոքր երկրների անվտանգության և բարեկեցության ապահովման հարցում՝ ՀՀ մշտական ներկայացուցիչը վստահություն է հայտնել ՄԱԿ-ի կառույցների ներուժին՝ նպաստելու մեր տարածաշրջանում խաղաղությանը, անվտանգությանը, արդարությանն ու օրենքի գերակայությանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր