Հայաստանի մշտական ներկայացուցիչը ելույթ է ունեցել ՄԱԿ Անվտանգության խորհրդում տարածաշրջանային կառույցների, խաղաղության և հակամարտությունների կարգավորման թեմայով հանդիպմանը

20 հոկտեմբերի, 2023

Հոկտեմբերի 20-ին ՄԱԿ Անվտանգության խորհրդում Բրազիլիայի նախագահությամբ կայացել է «Խաղաղությունը՝ երկխոսության միջոցով․ տարածաշրջանային, ենթատարածաշրջանային և երկկողմ կառույցների ներդրումը հակամարտությունների կանխարգելման և խաղաղ կարգավորման գործում» խորագրով հանդիպմումը, որին ելույթ է ունեցել ՄԱԿ-ում Հայաստանի մշտական ներկայացուցիչ Մհեր Մարգարյանը։

Անդրադառնալով խաղաղության և անվտանգության ապահովան գործում տարածաշրջանային կառույցների դերակատարությանը՝ Հայաստանի դեսպանը հիշատակել է տարիներ ի վեր ԵԱՀԿ Մինսկի խմբի համանախագահության շրջանակներում Լեռնային Ղարաբաղի հակամարտության խաղաղ կարգավորմանն ուղղված միջնորդական ջանքերը։ Շեշտվել է, որ 2020թ․ սեպտեմբերին Ադրբեջանը ավերիչ պատերազմ սանձազերծելով՝ դուրս եկավ տարածաշրջանային մեխանիզմի ներքո ընթացող բանակցություններից՝ ընտրելով լայնամասշտաբ ուժի կիրառումը։ Շեշտվել է, որ խախտելով Արդարադատության միջազգային դատարանի որոշումները՝ Ադրբեջանը տասը ամիս շրջափակման ներքո է պահել Լեռնային Ղարաբաղը, ինչին հաջորդել է ռազմական ներխուժում, որի հետևանքով ողջ բնակչությունը ենթարկվել է զանգվածային բռնի տեղահանության և էթնիկ զտման։

Դեսպան Մարգարյանն ընգծել է, որ ադրբեջանական ռազմական ագրեսիան կանխելու և Լեռնային Ղարաբաղի ժողովրդին պաշտպանելու հարցում տարածաշրջանային անվտանգային կառույցների անկարողության պայմաններում, ՄԱԿ-ը և Անվտանգության խորհրուրդն առանձնահատուկ պատասխանատվություն են կրում արդարություն ու հաշվետվողականություն ապահովելու և ստեղծելու արդյունավետ միջազգային մեխանիզմ՝ Լեռնային Ղարաբաղից տեղահանված բնակչությանը անվտանգ ու արժանապատիվ վերադարձի համար՝ միջազգային իրավունքի սկզբունքների համաձայն։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր