ՄԱԿ-ում ՀՀ մշտական ներկայացուցիչ Պարույր Հովհաննիսյանի ելույթը Պաշտպանելու պատասխանատվության վերաբերյալ ՄԱԿ Գլխավոր ասամբլեայի քննարկմանը

06 հուլիսի, 2026

Պաշտպանելու պատասխանատվության վերաբերյալ ՄԱԿ Գլխավոր ասամբլեայի քննարկմանը ՄԱԿ-ում ՀՀ մշտական ներկայացուցիչ Պարույր Հովհաննիսյանը վերահաստատեց Հայաստանի հանձնառությունը՝ առաջ մղելու «Պաշտպանելու պատասխանատվության» սկզբունքը՝ ուժեղացված կանխարգելման, վաղ նախազգուշացման և համատեղ գործողությունների միջոցով։

Դեսպան Հովհաննիսյանը նշեց, որ հայ ժողովուրդը շատ լավ գիտի ոճրագործությունների կործանարար հետևանքները։ Շեշտվեց Հայաստանի առաջատար դերը ՄԱԿ-ում կանխարգելման օրակարգի առաջմղման գործում՝ անդրադառնալով ՀՀ նախաձեռնությամբ սահմանված Ցեղասպանության հանցագործության զոհերի հիշատակի և արժանապատվության և այդ հանցագործության կանխարգելման միջազգային օրվան, Միջազգային օրվա 10-ամյակին նվիրված բարձր մակարդակի հանդիպմանը, «Ցեղասպանության կանխարգելում» խորագրով Մարդու իրավունքների խորհրդի երկամյա բանաձևին, ինչպես նաև վերջերս ընդունված «Կրթություն հանուն խաղաղության» Գլխավոր ասամբլեայի բանաձևին։

Ընդգծվեց, որ ՄԱԿ-ը՝ իր համապատասխան մեխանիզմների միջոցով, կրում է առանցքային պատասխանատվություն՝ ապահովելու արդյունավետ վաղ նախազգուշացում և կանխարգելիչ գործողություններ, նախքան իրավիճակները կվերածվեն մարդկային ողբերգությունների։ Այս համատեքստում շեշտվեց, որ «ՄԱԿ80» նախաձեռնության շրջանակներում ընթացող քննարկումները պետք է ամրապնդեն Կազմակերպության կանխարգելման կարողությունները:

Ելույթի տեքստն ամբողջությամբ հասանելի է հետևյալ հղումով՝ https://un.mfa.am/en/statements/2026/07/06/statement-by-h-e-mr-paruyr-hovhannisyan-permanent-representative-of-armenia-to-the-un-at-the-unga80/16066։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր