ՄԱԿ-ում Հայաստանի մշտական ներկայացուցչի տեղակալը ելույթ ունեցավ Միջին Արևելքում իրավիճակին նվիրված ՄԱԿ ԱԽ բաց քննարկմանը

16 հոկտեմբերի, 2026

ՄԱԿ-ում Հայաստանի Հանրապետության մշտական ներկայացուցչի տեղակալ Ժիրայր Անանյանը ելույթ ունեցավ «Իրավիճակը Միջին Արևելքում՝ ներառյալ Պաղեստինի հարցը» խորագրով Հունաստանի նախագահությամբ կայացած ՄԱԿ Անվտանգության խորհրդի բաց քննարկմանը։

Անհանգստություն հայտնելով մարդկային զոհերի և տառապանքի կապակցությամբ՝ ընդգծվեց, որ Հայաստանը նպաստում է Միջին Արևելքում անվտանգության ապահովմանը և հակամարտությունից տուժած բնակչության պաշտպանությանը մարդասիրական օգնության տրամադրմամբ, խաղաղապահ առաքելություններին և հետհակամարտային նախաձեռնություններին մասնակցությամբ։

Մարդասիրական խնդիրների համատեքստում, նշվեց, որ Հայաստանի Հանրապետության կառավարության աջակցությամբ և Առողջապահության համաշխարհային կազմակերպության հետ համագործակցությամբ Գազայից տեղափոխված երեխաներ բուժում են ստանում Երևանի հիվանդանոցներում։

Անընդունելի համարելով քաղաքացիական ենթակառուցվածքի թիրախավորումն՝ ընդգծվեց, որ Հայաստանը դատապարտում է Ռիյադի Աբհա և Խալիդ Թագավորի անվան միջազգային օդանավակայանների թիրախավորումները, որոնք հանգեցրել են մարդկային զոհերի, և համերաշխություն է հայտնում Սաուդյան Արաբիայի Թագավորության հետ։

ՄԱԿ-ում Հայաստանի մշտական ներկայացուցչի տեղակալը նաև առանձնանշեց տարածաշրջանի քրիստոնեական համայնքների ապահովության, անվտանգության և իրավունքների երաշխավորման նշանակությունը՝ հավելելով, որ որպես աշխարհի հնագույն քրիստոնյա ազգերից մեկը հայաստանյան կողմը մեծապես կարևորում է Սուրբ Հողում քրիստոնեական ժառանգության պահպանումը։

Ելույթում վերահաստատվեց Հայաստանի հաստատակամ աջակցությունը Լիբանանի ինքնիշխանությանը, տարածքային ամբողջականությանը և միասնականությանը։ Նշվեց, որ Հայաստանը պատրաստ է նպաստել Սիրիայում հետհակամարտային վերականգնման ջանքերին՝ տրամադրելով մարդասիրական և բժշկական աջակցություն և վերսկսելով մարդասիրական ականազերծման աշխատանքները։

Ելույթի տեքստն ամբողջությամբ հասանելի է հետևյալ հղումով՝ https://un.mfa.am/en/statements/2026/10/16/statement-by-mr-zhirayr-ananyan-deputy-permanent-representative-of-the-republic-of-armenia-to-the-u/16403:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր