ՄԱԿ-ում ՀՀ մշտական ներկայացուցիչը ելույթ է ունեցել զինված հակամարտություններում քաղաքացիական անձանց պաշտպանության թեմայով ՄԱԿ Անվտանգության խորհրդի նիստին

25 մայիսի, 2022

Մայիսի 25-ին ՄԱԿ Անվտանգության խորհրդի ԱՄՆ նախագահության ներքո տեղի է ունեցել քննարկում՝ «Զինված հակամարտություններում քաղացիական անձանց պաշտպանությունը» օրակարգի կետի ներքո։ Զեկույցներով հանդես են եկել ՄԱԿ Հումանիտար հարցերի համակարգման գրասենյակի, Կարմիր խաչի միջազգային կոմիտեի և քաղաքացիական հասարակության ներկայացուցիչները։

Հանդիպմանն իր ելույթում ՄԱԿ-ում ՀՀ մշտական ներկայացուցիչ Մհեր Մարգարյանը կարևորել է Ժնևի կոնվենցիաների և դրանց Լրացուցիչ արձանագրությունների լիարժեք ու առանց նախապայմանների իրականացումը՝ դատապարտելով միջազգային հումանիտար իրավունքի և մարդու իրավունքների խախտումները։

Անդրադառնալով 2020թ. աշնանը Արցախի դեմ Ադրբեջանի սանձազերծած ագրեսիային և դրա հումանիտար հետևանքներին՝ դեսպան Մարգարյանը ներկայացրել է միջազգային հաստատությունների զեկույցներում փաստագրված, քաղաքացիական բնակչության ու ենթակառուցվածքների վրա հարձակումները և մարդու իրավունքների խախտումները։

Նշվել է, որ հարևան երկրի կողմից պարբերական ագրեսիվ գործողությունները, ռազմական սպառնալիքներ պարունակող բռնի հռետորաբանությունը, պատմության խեղաթյուրումները, տարածքային նկրտումները և ձեռք բերված հանձնառություններից հետ կանգնելը պետք է լինեն միջազգային հանրության մտահոգության առարկա։

Մհեր Մարգարյանն ընդգծել է Լեռնային Ղարաբաղի բնակչության հումանիտար կարիքներին արձագանքելու նպատակով ՄԱԿ համակարգի կողմից անխափան գործողություններ ձեռնարկելու անհրաժեշտությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր